Ig u du, mir hei ds glyche Tattoo
Aber eine isch zviel i däm Schpiel, ig oder du
Wed schnäller ziesch, nimm d Liebi
Dr Ruhm u ds ganze Gold
Aber wenn mi dr Bode sött frässe
Söll niemer frage was i wott
I wott ke Schtei ufem Hoger
Nume es Chrüz us holz
U dr sand rünnt mir dür d finger
Gschpürsch dr Huuch vom Tod, Django...

Mir sy viel z lang zäme gritte dür jede Chuepflütter
Düre schnee u düre Schtoub
U itz steisch mir i dr Sunne
Dr Weschte isch wild u dr Oschte isch rot
I weiss, du ziesch schnäller
Aber i ziele genauer
U zwöi Schiessyse bysse Löcher
Ids erschte Morgegraue

U itz flüge d Geier uuf
U du bisch uf dym letschte Ritt
Sorry, dyni Zyt isch ume
U der Wind singt s Lied vor Prärie

Dr Western isch verbii, es het grägnet
U d Liebi, wo ni der Colt müesst für se zieh
Isch mir bis jetzt no nid begägnet
Dr Mustang isch nume es Velo
U dr Colt isch e Banane
U dr Bahnhofsplatz isch nid d Wüeschti vo Sonora
U d Aare nid dr Rio Grande
U morn muess ig is Schlachthuus go schaffe
Sie spile "Wiener Bluet"
Es isch ja nume e Film gsii u dr Wind singt s Lied vom Tod

I bi gäng e Cowboy gsii
U bi gäng e Cowboy blibe
U i ha mys Läbe lang nume Rindviecher vor mi häretribe

I bi gäng e Cowboy gsii
U bi gäng e Cowboy blibe
U i ha mys Läbe lang nume Rindviecher vor mi häretribe